ملحمة بحر البقر شعر : محمد عبدالباقي

( محمد عبدالباقي ) ، واحد من جيل بحر البقر وشاهد عيان على الحادث ، هو الآن أحد أدباء الشرقية المعروفين ورئيس نادي أدباء الحسينية ، له قصيدة كتبها من أكثر من 25 سنة تجسد المأساة ، وتؤرخ للحدث ، صارت هذه القصيدة من تراث قرية بحر البقر ومركز الحسينية ، يحفظها الصغار و يتناقلها الكبار وتغنى في تلك المناسبة ، وينشدها كل تلاميذ القرية في صباح هذا اليوم من كل عام .

[عدل] ===========================

ملحمة بحر البقر شعر : محمد عبدالباقي

[عدل] ============================

قومي يا فاطمة عشان مدرستك
و انت كمان قوم يا حسين
قوم يا حبيبي إنت وأختك
أيوه يا أمي خلاص قايمين
قوم يا حبيبي الشمس أهي طلعت
طالعة تبوس خد الشاطرين
صباح الخير عليكي يا أمي
صباح الفل على الطعمين
تعالي يا فاطمة أعملك شعرك
الله يصون ست الحلوين
ياللا يا شطار آدي الإفطار
تسلم إيد ست الغاليين
آدي شنطكم وآدي كتبكم
يحميكوا ربي من الحاسدين
( من جد وجد )..
( من زرع حصد ) ..
ومرت ساعة أو ساعتين
وفجأة ..!!
قنابل زي السيل
نازلة ياعيني على المساكين
وصراخ يعلى ...
وصوت بيهدي ..:
أمي ...
أبويا ....
وراحوا ساكتين ..
وصوت بينادي :
-فين أولادي ..؟
.. راحوا مني في غمضة عين ..؟ والتانية بتصرخ :
ابني وحيدي ..
لغيرك يا بني أنا عايشة لمين ..؟
والتالتة بتجري وتصرخ برضه :
-ابني
-حبيبي ... -ضنايا فين ..؟
آدي مسطرته ..
وآدي كراسته ..
مكتوب فيها يادوب سطرين
سطرين بس انكتبوا بدمه
يحكوا ندالة الخاينين
و آدي كراسة ( فاطمة المصري )..
.. وآدي كتاب أخوها ( حسين ) ..!!
.. و آدي شريط الشعر بتاعها
وكمان شنطة ( ليلى أمين )
سجل يا تاريخ واكتب عندك
طيران ..
وقنابل ..
وكراستين ..!!!
وأزهار بيضا بتنزف دم
مين ضمايرهم تصرخ ..؟
مين …؟
وكمان يا تاريخ وقَّف لحظة
خلينا نبوس ( فاطمة )
و ( حسين ) .

---